Законот за јавно обвинителство го помина првото читање на Комисијата за политички систем и односи меѓу заедниците и на Законодавно-правната комисија во Собранието

Клучни измени:
1. Оценување на јавните обвинители
 • Наместо на секои 4 години, работата на јавните обвинители ќе се оценува на секои 3 години, со цел поконтинуирана и систематска проверка на нивната работа.
 • Се воведува и вонредно оценување: по негативна оцена, обвинителот повторно ќе биде оценет, како механизам за следење и корекција на утврдени слабости.
2. Избор на Јавен обвинител на Република Северна Македонија
Со цел поголема транспарентност и професионалност во изборниот процес:
 • Кандидатите ќе поднесуваат Програма за работа и биографија.
 • Советот на јавните обвинители ќе организира јавна седница на која кандидатите ќе ја презентираат својата програма.
 • Програмите и биографиите ќе бидат јавно објавени на веб-страницата на Советот.
3. Дисциплинска постапка за јавни обвинители
Се воспоставува појасна дисциплинска рамка:
 • Повредите се категоризираат како лесни, потешки и најтешки дисциплински повреди.
 • Советот одлучува по жалба во рок од 30 дена.
 • Дисциплинската комисија ја завршува постапката во рок од 6 месеци, односно до 9 месеци во посложени случаи.
 • На расправите присуствува и претставник од Здружението на јавни обвинители, со цел професионална застапеност.
 • Ако обвинител побара разрешување додека трае дисциплинската постапка, постапката продолжува до конечна одлука, со што се спречуваат злоупотреби.
 • Се воведува евиденција за изречените дисциплински мерки.
4. Финансиска независност –
Во законот се вградува гаранција за финансиска автономија, преку утврдување на минимално законски загарантирано ниво на финансирање.
За законот е добиено позитивно мислење од Венецијанската комисија.
Во вторник, законот ќе се најде на дневен ред пред пратениците во Собранието.