Shasivari - Soriano Ortiz: Thellimi i bashkëpunimit me Spanjën në reformat e gjyqësorit

Ministri i Drejtësisë, Jeton Shasivari, sot u takua me ambasadorin e Mbretërisë së Spanjës, Sh. T. Rafael Soriano Ortiz.
Ministri Shasivari  e njoftoi ambasadorin me prioritetet e ministrisë dhe  me aktivitetet  që po realizohen në kuadër të  Agjendës së Reformave. Gjatë periudhës së ardhshme priten hapa konkrete ligjore dhe institucionale, në drejtim të përmirësimit të efikasitetit dhe cilësisë  së sistemit  gjyqësor.
Vëmendje të veçantë  iu përkushtua  mundësive për thellimin e bashkëpunimit me Spanjën dhe shfrytëzimin e  përvojës së saj në fushat që ndërlidhen me funksionimin e  institucioneve të gjyqësorit  dhe sundimit të ligjit.
Ambasadori Soriano Ortiz shprehi gatishmërinë e Spanjës  për të vazhduar mbështetjen e reformave.
Bashkëpunimi me  partnerët evropianë është pjesë e rëndësishme e procesit reformues, por rezultati matet përmes  ndryshimeve konkrete dhe funksionimit  më të mirë të institucioneve. Ministria e Drejtësisë mbetet  e përkushtuar në realizimin e këtyre qëllimeve.