Komisionet parlamentare për Sistem Politik dhe Marrëdhënie Ndërmjet Bashkësive dhe Komisioni Legjislativ-Juridik, në lexim të parë, mbështetën Projektligjin për Shërbimin Gjyqësor dhe Projektligjin për Shërbimin e Prokurorisë Publike, të cilët përbëjnë pjesë të paketës kyçe reformuese për forcimin e pavarësisë, profesionalizmit dhe efikasitetit të sistemit të drejtësisë.
Të dy projektligjet janë përgatitur në kuadër të detyrimeve të përcaktuara në Agjendën e Reformave dhe Strategjinë Zhvillimore Sektoriale për Drejtësinë 2024–2028 dhe kanë për qëllim krijimin e një sistemi modern dhe funksional për menaxhimin e burimeve njerëzore në gjykata dhe prokurori publike.
Ndër risitë më të rëndësishme veçohen:
• Vendosja e një statusi të veçantë për nëpunësit gjyqësorë dhe të prokurorisë publike si nëpunës administrativë të veçantë, duke njohur specifikat e punës së tyre dhe duke braktisur modelin e marrë nga sistemi i përgjithshëm i nëpunësve administrativë;
• Sistem i ri për punësim dhe avancim, i përshtatur me nevojat e gjykatave dhe prokurorive publike, që siguron përzgjedhjen e kuadrove më profesionale dhe më cilësore;
• Krijimi i mundësive reale për zhvillim në karrierë dhe avancim brenda shërbimit, veçanërisht për kuadrot profesionale dhe juristët;
• Forcimi i autonomisë kadrovike dhe zvogëlimi i varësisë nga pushteti ekzekutiv në planifikimin e punësimeve;
• Sistem i ri për llogaritjen e pagave, me të cilin rritjet e siguruara përmes kontratave kolektive bëhen pjesë përbërëse e pagës bazë;
• Forcimi i përgjegjësisë disiplinore, integritetit dhe mekanizmave për mbrojtjen e të drejtave të të punësuarve;
• Rregullim më i mirë i statusit të policisë gjyqësore dhe kategorive të tjera të të punësuarve në institucionet e drejtësisë.
Zëvendësministri i Drejtësisë, Alen Dereban, theksoi se miratimi i këtyre ligjeve përbën një hap të rëndësishëm drejt krijimit të një administrate gjyqësore të qëndrueshme dhe profesionale.
“Me këto zgjidhje ligjore, për herë të parë vendosim një sistem që njeh specifikat e punës së nëpunësve gjyqësorë dhe të prokurorisë publike. Krijojmë kushte për zhvillim profesional, vlerësim të drejtë të punës, pavarësi më të madhe institucionale dhe funksionim më efikas të gjykatave dhe prokurorive publike. Qëllimi ynë është të kemi institucione të forta, të mbështetura nga një shërbim profesional dhe i
motivuar, i cili do të kontribuojë në ofrimin e shërbimeve më cilësore për qytetarët dhe në forcimin e besimit në sistemin e drejtësisë”, deklaroi Dereban.
Në fazën e ardhshme të procedurës parlamentare do të organizohen debate publike, ku do të marrin pjesë përfaqësues të shërbimit gjyqësor dhe të prokurorisë publike, institucioneve, publikut profesional, komunitetit akademik dhe sektorit civil, me qëllim përmirësimin e mëtejshëm të zgjidhjeve ligjore të propozuara përmes një dialogu gjithëpërfshirës dhe transparent.
Projektligjet janë financiarisht të qëndrueshme dhe zbatimi i tyre nuk shkakton implikime shtesë buxhetore përtej mjeteve tashmë të planifikuara.
