Ministri i Drejtësisë Igor Filkov sot mori pjesë në shënimin e përvjetorit të rëndësishëm me rastin e takimit të 90-të të juristëve, të organizuar nga Shoqata e Juristëve të Maqedonisë.
Duke iu drejtuar ekspertëve ligjorë, profesorëve, gjyqtarëve, prokurorëve, avokatëve dhe juristëve të rinj të pranishëm, Ministri Filkov theksoi se kjo traditë përfaqëson një urë lidhëse midis shkencës juridike dhe praktikës, midis profesioneve të ndryshme juridike dhe gjeneratave që besojnë në fuqinë e të drejtës si themel i demokracisë dhe rendit shoqëror.
“Qytetarët sot kërkojnë një gjyqësor efikas, të paanshëm dhe të arritshëm. Kërkojnë vendime gjyqësore që vijnë në kohë, aktakuza që bazohen në fakte dhe prova, jo në supozime, institucione që punojnë për interesin publik, jo për individë. Si Ministri e Drejtësisë, ne jemi plotësisht të përkushtuar për të përmbushur këto pritje. Kjo është arsyeja pse kemi filluar reformat në gjyqësor, në Këshillin Gjyqësor, në Këshillin e Prokurorëve Publikë dhe në Prokurorinë Publike. Në vazhdimësi jemi duke i harmonizuar ligjet me standardet evropiane dhe rekomandimet e Komisionit të Venedikut - për të cilat morëm komente pozitive prej tij, me rekomandimet e GRECO-s dhe Komisionit Evropian. Ky është një proces gjithëpërfshirës që do të donim të vendosej si praktikë që tani e tutje. Por, reformat nuk janë vetëm ligje - reformat janë njerëz. Ligji mund të jetë i shkëlqyer, por nëse nuk ka integritet, njohuri dhe përgjegjësi midis atyre që e zbatojnë - ai mbetet vetëm një shkronjë në letër”, tha Ministri i Drejtësisë Igor Filkov.
Ministri Filkov theksoi gjithashtu edhe rëndësinë e përfshirjes së juristëve të rinj, të cilët nuk janë vetëm “e ardhmja”, por edhe “e tashmja që po vjen”.
“Detyra jonë është t'u japim atyre njohuri, mjete dhe një shembull ndershmërie, profesionalizmi dhe shërbimi ndaj drejtësisë”, shtoi ministri, duke bërë thirrje për një diskutim të hapur mbi sfidat e reja që po sjell epoka dixhitale - nga mbrojtja e të drejtave të njeriut, deri te zbatimi i inteligjencës artificiale në gjyqësor.
